Susanna Meister

Geschäftsführerin

I mim Läbe spieled Tier e ganz grossi Rolle, ich chönti nid si ohni. Han Vögel und Meersäuli gha und bin mit eme Pudel ufgwachse.

Ich han im 2006 min Unix übercho und ha dur ihn, bi sinere Züchteri wärend acht Jahr agfange hüete. Nebe de ganze Hünd hani au no ihri Katze, Hüehner, Saue, Esel und Schaf versorget.


De Unix isch immer bi mir gsi bis ich im 2014 en neue Job agfange han und en Hüetedienst brucht ha. So han ich d'Susanne kenne glernt. Im Herbst hät sie mir es Agebot gmacht bi ihre im Sitting mit 50% izstiege.
Und so han ich dank em Unix, de Susanne und de Unterstüzig vo mim Partner mis Hobby chöne zum Bruef mache.

 

Sit em 2015 begleitet mich dä Neffe vom Unix dä Gaahl. 

Im Früehlig 2017 hät mir d' Susanne s' Agebot gmacht s' Hundesitting als Gschäftsfüehrerin z'überneh. Somit füehr ich sit em 1. Januar Sitting elei. Han aber s Glück gha mit dä Sabrina Jendt, wo bi mir s' Praktikum gmacht hät, öpper z'finde  wo 1 Tag i de Wuche und Ferieablösig macht.  Somit chönd mir dä Betrieb ohni Unterbrechig ufrecht erhalte. 


SAbrina Jendt

Scho siit chli han ich immer Tier gha. Han dörfe mit Chatze, Hase, Hund und Ross ufwachse und früeh glernt, was es heisst es Tier zbetreue.  Au hüt dörfet mich Tier dur mis Läbe begleite. Mini zwei Chatze dä Tiger und s Baby und au min Hund dä Raku, hend mich letscht Jahr bim Umzug vo Züri uf Buch SH begleitet. Da in Buch isch na mis Pflegross Tanka derzue cho.